ဒါရိုက်တာ David Lowery ရိုက်ကူးပြီး A24 ကနေ ထုတ်လုပ်ဖြန့်ချိခဲ့တဲ့ The Green Knight (2021) ဟာ သာမန်ဓားခုတ်လှံထိုး King Arthur ခေတ် ဟောလိဝုဒ်အက်ရှင်ကားမျိုး လုံးဝ မဟုတ်ပါဘူး။ ၁၄ ရာစုက ထွက်ရှိခဲ့တဲ့ "Sir Gawain and the Green Knight" ဆိုတဲ့ ကဗျာလင်္ကာရှည်ကြီးကို အခြေခံပြီး၊ လူသားတစ်ယောက်ရဲ့ ဂုဏ်သိက္ခာ၊ ကြောက်ရွံ့မှုနဲ့ သေခြင်းတရားအကြောင်းကို ဒဿနဆန်ဆန်၊ အနုပညာမြောက်မြောက် ပုံဖော်ထားတဲ့ Dark Fantasy / Psychological Drama တစ်ခု ဖြစ်ပါတယ်။

ဇာတ်လမ်းက King Arthur ဘုရင်ကြီးရဲ့ တူတော်စပ်သူ Gawain ဟာ သူရဲကောင်းတစ်ယောက် ဖြစ်ချင်ပေမယ့် တကယ်တမ်းမှာတော့ အရက်သောက်၊ အပျော်အပါးမက်ပြီး ဘာရာဇဝင်ကြောင်းမှ မရှိသေးတဲ့ လူငယ်တစ်ယောက်ပါ။ ခရစ္စမတ်အကြိုနေ့ နန်းတွင်းညီလာခံကျင်းပနေတုန်း... သစ်ပင်သစ်ကိုင်းတွေနဲ့ ဖွဲ့စည်းထားတဲ့ လျှို့ဝှက်ဆန်းကြယ် သစ်ပင်ဘီလူးကြီး The Green Knight ရုတ်တရက် ရောက်ရှိလာပြီး ကစားပွဲတစ်ခု ကမ်းလှမ်းပါတယ်။ "ဒီထဲက ဘယ်သူမဆို ငါ့ကို ဓားနဲ့ တစ်ချက်ခုတ်နိုင်တယ်။ ဒါပေမဲ့ ခုတ်တဲ့သူဟာ နောက်တစ်နှစ်အကြာ ခရစ္စမတ်နေ့မှာ ငါ့ဆီ လာရောက်ပြီး အဲဒီဒဏ်ရာအတိုင်း ပြန်အခုတ်ခံရမယ်" တဲ့။

Gawain ဟာ နာမည်ကြီးချင်ဇောနဲ့ ရှေ့ထွက်ပြီး Green Knight ကြီးရဲ့ ခေါင်းကို ဖြတ်ချလိုက်ပါတယ်။ ဒါပေမဲ့ အံ့ဩစရာက Green Knight ကြီးဟာ သူ့ခေါင်းပြတ်ကြီးကို ပြန်ကောက်ပြီး ရယ်မောကာ ထွက်ခွာသွားခဲ့ပါတယ်။ နောက်တစ်နှစ်အကြာမှာတော့ Gawain ဟာ ကတိအတိုင်း သူ့ခေါင်းပြန်ပေးဖို့အတွက် Green Chapel  ရှိရာဆီ တစ်ကိုယ်တော် ရှည်လျားတဲ့ ခရီးစဉ်ကို စတင်ရပါတော့တယ်။ လမ်းခရီးမှာ သူဟာ လမ်းပြမြေပုံမရှိတဲ့ တောနက်ကြီးတွေ၊ လျှို့ဝှက်ဆန်းကြယ်တဲ့ သရဲတစ္ဆေတွေ၊ စုန်းကဝေတွေနဲ့ လူသားတို့ရဲ့ စိတ်အာရုံကို နှောင့်ယှက်တဲ့ စုံစမ်းစစ်ဆေးမှုတွေကြားမှာ... သူ့ရဲ့ "သူရဲကောင်းဂုဏ်သိက္ခာ" ကို အသက်နဲ့လဲပြီး ဘယ်လို ထိန်းသိမ်းသွားမလဲဆိုတာ တွေ့မြင်ရမှာပါ။

The Green Knight (2021) ဟာ သာမန်ဖျော်ဖြေရေး Popcorn ရုပ်ရှင် မဟုတ်ဘဲ၊ ရုပ်ရှင်ဝါသနာအိုးတွေနဲ့ အနုပညာရသကို အလေးထားသူတွေ မဖြစ်မနေ ကြည့်ပြီး ခံစားရမယ့် A24 ရဲ့ အဆင့်မြင့် Dark Fantasy အနုပညာလက်ရာမွန် ဖြစ်ပါတယ်။ သေခြင်းတရားကို ရင်ဆိုင်ရချိန်မှာ လူသားတစ်ယောက်ရဲ့ ဂုဏ်သိက္ခာဟာ ဘာလဲဆိုတာကို လှပခြောက်ခြားစွာ မေးခွန်းထုတ်သွားတဲ့ ကားကောင်းဖြစ်ပါတယ်။

My Rating: 8.5/10

AP